Навіны раёна

Моладзевы парламент пры раённым Савеце дэпутатаў працягвае ініцыятыву па добраўпарадкаванні тэрыторый раёна. Летам маладыя лёзненцы прывялі ў парадак дзіцячую пляцоўку на вуліцы Чкалава гарпасёлка, а ў суботу папрацавалі каля помніка ахвярам фашызму на Адаменскай горцы. Рабяты выдалілі пустазеллі і пафарбавалі плот.

У працах бралі ўдзел (пад кіраўніцтвам галоўнага спецыяліста аддзела ідэалагічнай работы і па справах моладзі райвыканкама, дэпутата раённага Савета дэпутатаў Вольгі Магучай) Анастасія Дулуб, Уладзімір Гелавеня, Арцём Пчёлкін, Яна Багачова, Анастасія Салаўёва.

Вольга Магучая, галоўны спецыяліст аддзела ідэалагічнай работы і па справах моладзі райвыканкама, дэпутат раённага Савета дэпутатаў:

- Наша моладзь не застаецца ў баку ад добраўпарадкавання раёна. Важна, што ініцыятыва хлопцаў не толькі на паперы, але і ў канкрэтных справах, сапраўдных учынках. У гэтым і ёсць наш патрыятызм - падмацоўваць словы справамі, берагчы гістарычную памяць, самім ствараць чысціню і прыгажосць вакол.

На воінскім пахаванні, размешчаным каля вёскі Бычкова, дзе спачываюць пяць воінаў, якія аддалі жыцці за вызваленне раёна, некалькі дзён працавалі работнікі тэрытарыяльнага цэнтра сацыяльнага абслугоўвання насельніцтва.

- Жывёла на выпасе неаднаразова ламала тут агароджу, - падзялілася старшыня Лёзненскага сельскага Савета Святлана Пукава. - На мінулым тыдні мы яе замянілі: укапалі жалезабетонныя слупы, усталявалі ўмацаваную драўляную загароду, пафарбавалі яе, навялі парадак на тэрыторыі.

Усяго, паводле слоў Святланы Уладзіміраўны, у Лёзненскім сельвыканкаме на ўліку знаходзяцца 34 воінскія пахаванні. Штогод тут праводзіцца вялікі аб'ём работ па іх падтрыманні ў патрэбным стане і добраўпарадкаванні.