Навіны рэспублікі
Лукашэнка: Беларусь, нягледзячы ні на што, захоўвае бясцэнны вопыт кантактаў з Германіяй
Прэзідэнт Беларусі Аляксандр Лукашэнка павіншаваў народ Федэратыўнай Рэспублікі Германія з нацыянальным святам - Днём германскага адзінства. Пра гэта БЕЛТА паведамілі ў прэс-службе беларускага лідара.
"Беларусы вельмі добра ведаюць сапраўднае значэнне гэтага паняцця. Амаль два дзесяцігоддзі наш народ быў падзелены штучнымі межамі, што не спрыяла нармальным адносінам, развіццю краіны і не давала ніякіх перспектыў, - гаворыцца ў віншаванні. - Потым яшчэ большыя страты нанесла Другая Сусветная вайна, якая забрала кожнага трэцяга жыхара. Гэтыя жудасныя факты не павінны забываць ні беларусы, ні немцы".
Кіраўнік дзяржавы падкрэсліў: "Нам вельмі часта даводзіцца чуць, што нельга ўнесці карэктывы ў ход гісторыі. Але мы з'яўляемся не проста сведкамі сучасных падзей, а маем уплыў на іх і можам змяніць негатыўны сцэнар развіцця".
Аляксандр Лукашэнка звярнуў увагу, што сучаснае пакаленне беларусаў і немцаў мае шмат агульнага і разумее адзін аднаго куды лепш, чым сто гадоў таму. "Назапашаны бясцэнны вопыт кантактаў у самых разнастайных галінах. Мінск іх беражліва захоўвае нягледзячы ні на што. Дзверы нашага дома заўсёды адкрыты для гасцей з Германіі і іншых краін, для ўсіх людзей добрай волі, якія прыходзяць да нас з чыстым сэрцам і жадаюць дабра, - адзначыў беларускі лідар. - Веру, вельмі хутка да каштоўнасці адзінства, якое так цяжка нам далося, дададуцца згода і паразуменне. Сардэчна запрашаем у Беларусь!"
