Навіны раёна

Асноўнае пытанне-гатоўнасць сельгаспрадпрыемстваў да ўборачнай кампаніі. Па даручэнні Прэзідэнта А.Р. Лукашэнкі ўся тэхніка да 8 ліпеня павінна была быць выстаўлена на лінейку гатоўнасці. 

Ва ўсіх абласцях, акрамя Віцебскай, ужо стартавала ўборка яравога ячменю. Чакаецца, што на наступным тыдні, да жніва пачнуць у асобных сельгаспрадпрыемствах раёна. 

Дырэктар ААТ "Лёзненскі райаграсэрвіс" Дз.В. Грыгаровіч далажыў аб гатоўнасці тэхнікі і зернесушыльных установак да ўборачнай, гаспадаркі, наяўнасці механізатарскіх кадраў, падрыхтоўцы складскіх памяшканняў. 

Галоўны дзяржаўны інспектар па наглядзе за тэхнічным станам машын і абсталявання ўпраўлення па сельскай гаспадарцы і харчаванні райвыканкама С.Л. Юдаў праінфармаваў аб выніках агляду гатоўнасці тэхнікі ў асобных гаспадарках, адзначыўшы, што практычна ўсюды маюцца асобныя недапрацоўкі, якія не патрабуюць вялікіх матэрыяльных затрат. 

Галоўны спецыяліст аддзела арганізацыі сельгасвытворчасці райсельгасхарча С.М. Волкаў паведаміў аб тым, што ў ходзе ўборкі плануецца задзейнічаць 41 камбайн, і не менш за 30 грузавых аўтамабіляў МАЗ для перавозкі збожжа. 

І. І. Федараў звярнуў увагу кіраўнікоў і адказных асоб на тое, што наступіў той перыяд, калі адначасова неабходна праводзіць і нарыхтоўку кармоў, і рыхтавацца да ўборачнай, і ўжо планаваць правядзенне сяўбы азімага рапсу.

- Павінен пераважаць тэхналагічны падыход ва ўсім, асабліва ў сяўбе, - падкрэсліў Іван Іванавіч. - Пачынаючы ад набыцця якаснага насення, падбору і падрыхтоўкі палёў да выканання тэхналагічных тэрмінаў і налады пасяўных агрэгатаў. Планы напружаныя, да другой дэкады жніўня варта пасеяць не менш за 2200 гектараў азімага рапсу. Цяперашні сельскагаспадарчы год у чарговы раз пацвердзіў аксіёму, што для Прыдзвіння найбольш прымальны варыянт – сяўба азімых у тэхналагічныя тэрміны. Чакаю ад усіх якаснай высокатэхналагічнай работы на будучыню сельскагаспадарчай галіны раёна. 

У ходзе калегіі былі таксама разгледжаны пытанні нарыхтоўкі кармоў, вытворчасці малака, узнаўлення статка і прадухілення склону і невытворчага выбыцця жывёлы, падрыхтоўкі жывёлагадоўчых памяшканняў да стойлавага перыяду. 

Аляксандр Піута, "Сцяг Перамогі"