Навіны рэспублікі
Акцыя "Раскажы аб сваёй крыніцы" стартуе ў Беларусі
Акцыя "Раскажы аб сваёй крыніцы" пройдзе ў Беларусі з 5 чэрвеня па 31 кастрычніка, паведамілі БЕЛТА ў прэс-службе Міністэрства прыродных рэсурсаў і аховы навакольнага асяроддзя.
Яе мэта - прыцягнуць грамадскасць у працэс даследавання, добраўпарадкавання і аховы водных аб'ектаў малой радзімы. "Крыніцы - унікальныя прыродныя водныя аб'екты з пункту гледжання іх фарміравання, ролі ў захаванні ландшафтнай і біялагічнай разнастайнасці і магчымасцей выкарыстання. Часта яны даюць пачатак рэкам і ручаям. Некаторыя з іх маюць сакральнае значэнне з прычыны таго, што іх вада лічыцца лекавай. Акрамя таго, крыніцы актыўна выкарыстоўваюцца для нецэнтралізаванага водазабеспячэння, маюць важнае значэнне для развіцця турызму", - адзначылі ў Мінпрыроды.
Удзельнікі інфармацыйнай кампаніі могуць расказаць аб адной з крыніц з дапамогай відэа- і фотарэпартажаў, СМІ (тэлебачанне, радыё, газеты, часопісы, інфармацыйныя рэсурсы ў інтэрнэце, сацсеткі з хэштэгам #родникибеларуси).
Да акцыі прымеркаваны конкурс на лепшыя работы па інвентарызацыі крыніц. Яго праводзіць Цэнтральны навукова-даследчы інстытут комплекснага выкарыстання водных рэсурсаў (ЦНДІКВВР). Канкурсантам трэба будзе абследаваць крыніцы (самастойна або сумесна з прадстаўніком раённай інспекцыі прыродных рэсурсаў і аховы навакольнага асяроддзя) і сабраць неабходную інфармацыю згодна з патрабаваннямі арганізатара. Да ўдзелу запрашаюцца ўсе жадаючыя: мясцовыя жыхары, школьнікі, педагогі, маладзёжныя і грамадскія арганізацыі. Пералік крыніц для даследавання размешчаны на сайце ЦНДІКВВР.
Вынікі акцыі "Раскажы аб сваёй крыніцы" падвядуць 3-4 лістапада ў час VI Міжнароднага воднага форуму "Крыніцы Беларусі" ў Мінску.-0-
