У рамках падрыхтоўкі да фіналу рэспубліканскага турніру сярод дзяцей і падлеткаў па футболе «Скураны мяч» на прызы Прэзідэнцкага спартыўнага клуба, які пройдзе ў верасні ў Мінску, 9 жніўня на цэнтральным стадыёне гарпасёлка прайшоў адкрыты турнір па футболе, прысвечаны Году міру і стварэння, з удзелам каманд з Глыбокага, Сянно, Дуброўна і Бешанковіч.
Лёзненцы выставілі дзве каманды - ФСК-1 і ФСК-2, якія на папярэднім этапе атрымалі перамогі ў сваіх падгрупах. ФСК - 1 не без працы абыграла сапернікаў з Дуброўна (2:1) і Сянно (3:1), ФСК-2 упэўнена разабралася з юнымі футбалістамі з Бешанковічаў (4:0) і глыбокага (7:1).
У матчы за трэцяе месца сустрэліся хлопцы з Сянно і глыбокага. Гульня аказалася ўпартай, сенненцам спачатку ўдалося адарвацца на два мячы, але глыбачане здолелі адзін адыграць. Але, на жаль, хоць другую палову матчу яны і дамінавалі, поспеху не хапіла, каб звесці сустрэчу хоць бы да нічыёй. У выніку перамога дасталася камандзе з Сянно.
У фінале за першае месца біліся дзве лёзненскія каманды. Тут на першых хвілінах гульцам з ФСК-1 удалося забіць два мячы і затым яны не без намаганняў давялі гульню да пераможнага канца. Выніковы лік – 3: 1.
Аналізуючы сустрэчу, можна адзначыць, што ў дадзеным выпадку, як кажуць спецыялісты, парадак пабіў клас. Футбалісты з ФСК-2 былі цікавей індывідуальна, а ФСК-1 паказалі каманднае паразуменне і выкананне трэнерскіх установак.
Такім чынам, першымі на турніры сталі юныя футбалісты ФСК-1, другімі – ФСК-2, трэцімі – ФК Сянно. Лепшымі ў сваіх намінацыях прызнаныя: Арцём Фёдаравіч (ФСК-2, бамбардзір), Мікіта Караткевіч (ФСК-2, гулец), Іван Біль (ФК Сянно, нападаючы), Акім Філоненка (ФСК-1, абаронца), Аляксей Бурмак (ФСК-2, брамнік).
Тэхнічная падтрымка сайта. ООО "AskerWeb"
