Як паведаміў старшыня раённай арганізацыі АСВОД Аляксандр Цімошчанкаў, з 15 мая афіцыйна адкрываецца купальны сезон, які працягнецца да 15 верасня.
Як і ў мінулым годзе, купанне ў раёне дазволена на двух вадаёмах: возеры Буеўскім і ў зоне адпачынку «Лясныя кар'еры».
Для бяспекі тых, кто купаецца, набрана каманда выратавальнікаў з шасці чалавек, якія будуць несці дзяжурства на пазначаных акваторыях.
У аўторак, 2 мая, Віцебскі АСВОД накіраваў у наш раён начальніка манеўрана-пошукавай групы Міхаіла Сушчанка і вадалаза Мікіту Аляксеенку для ажыццяўлення маніторынгу і ачысткі пляжу і дна зон купання. Аплаціла іх працу (а гэта каля тысячы рублёў) УП ЖКГ.
Мужчыны - прафесіяналы сваёй справы. Міхаіл-вадалаз з трыццацігадовым стажам. Дзесяць гадоў пакарае глыбіні віцебскіх вадаёмаў Мікіта. Самае складанае і адказнае, з чым даводзіцца час ад часу сутыкацца – пошук патанулых. А вось Ачыстка пляжаў - справа зусім іншая, хоць спалучана з пэўнай рызыкай. Бачнасць падводнага свету Буеўскага возера ў пачатку траўня - не больш за метр, вада яшчэ не прагрэлася, і нават у спецыяльным касцюме праз паўгадзіны працы Мікіта ўжо не адчувае рук ад холаду. Каб сагрэцца, трэба зняць экіпіроўку, якая разам з аквалангам важыць пятнаццаць кілаграмаў, і выпіць гарачага чаю з тэрмаса.
Дарэчы, прадметаў, якія маглі б траўмаваць купальшчыкаў, у вадаёмах выяўлена не было, за выключэннем некалькіх камянёў, якія былі вынятыя на бераг. Хоць бітыя бутэлькі, па словах вадалазаў, звычайна сустракаюцца ў вадзе даволі часта.
У сувязі з гэтым Аляксандр Цімошчанкаў звяртаецца да лёзненцаў з просьбай выконваць элементарную чысціню ў месцах адпачынку, трымаць пад кантролем непаўналетніх дзяцей і выконваць максімальна магчымыя меры асцярожнасці пры купанні.
Паводле звестак АСВОД, за мінулы год у Беларусі патанула 386 чалавек, з іх 24 – непаўналетніх. Толькі сёлета на вадзе загінула 103 чалавекі, з іх 13 – у Віцебскай вобласці.
Тэхнічная падтрымка сайта. ООО "AskerWeb"
