Навіны рэспублікі

Беларускія банкі ў 2020 годзе накіравалі на дабрачыннасць больш за Br35 млн, паведамілі БЕЛТА ў Асацыяцыі беларускіх банкаў (АББ).

Каля палавіны гэтай сумы было накіравана на развіццё фізкультуры і спорту, устаноў адукацыі, яшчэ трэць - на падтрымку ўстаноў аховы здароўя ва ўмовах няпростай эпідсітуацыі. Дапамога аказваецца таксама інвалідам, ветэранам, шматдзетным сем'ям, сродкі накіроўваюцца і на іншыя сацыяльна значныя мэты.

"Усведамляючы сваю сацыяльную адказнасць, крэдытна-фінансавыя ўстановы штогод выдзяляюць значныя сумы на дабрачыннасць. Пры гэтым дадатковую матэрыяльную дапамогу аказваюць таксама даччыныя кампаніі і супрацоўнікі банкаў сваімі асабістымі сродкамі. І гэта добрая традыцыя будзе прадоўжана", - адзначыў старшыня АББ Уладзімір Драгун.

Асацыяцыя беларускіх банкаў створана ў 1990 годзе для каардынацыі дзейнасці крэдытна-фінансавых устаноў і цяпер аб'ядноўвае 35 банкаў і арганізацый. Яна з'яўляецца адным з заснавальнікаў і членам Міжнароднага каардынацыйнага савета банкаўскіх асацыяцый краін СНД, Цэнтральнай і Усходняй Еўропы, заключаны партнёрскія пагадненні больш як з 20 банкаўскімі і бізнес-аб'яднаннямі Расіі, Украіны, СНД, ЕАЭС, Сярэдняй Азіі і Еўропы.

БелТА