Навіны рэспублікі

Тарыфы на паслугі па транспарціроўцы нафты па магістральных трубаправодах, размешчаных на тэрыторыі Беларусі, з 1 лютага павышаюцца на 6,6 працэнта. Гэта прадугледжана пастановай Міністэрства антыманапольнага рэгулявання і гандлю нумар 6 ад 22 студзеня 2021 года, паведамілі БЕЛТА ў прэс-службе МАРГ.

Транспарціроўка нафты выконваецца па транзітных напрамках і па маршрутах для ўнутранага спажывання. "У 2020 годзе назіралася істотнае зніжэнне аб'ёмаў транзіту нафты ў параўнанні з запланаваным узроўнем, што паўплывала на аб'ём атрыманай выручкі ААТ "Гомельтранснафта Дружба". На фінансава-эканамічную дзейнасць ААТ у мінулым годзе таксама негатыўна паўплывала ўвядзенне экалагічнага падатку і павелічэнне падатку на прыбытак для арганізацый трубаправоднага транспарту", - расказалі ў прэс-службе.

У жніўні 2020 года ААТ "Гомельтранснафта Дружба" ініцыявала разгляд пытання аб пазапланавым пераглядзе тарыфаў, што не было падтрымана расійскім бокам. Затым ААТ прапанавала павялічыць у 2021 годзе тарыфы на паслугі па транспарціроўцы нафты на 24,5 працэнта, каб кампенсаваць недаатрыманыя даходы за 2020 год.

Механізм змянення тарыфаў на транзіт нафты прадугледжвае ўзгадненне іх росту паміж арганізацыямі трубаправоднага транспарту беларускага і расійскага бакоў. Калі яны не дамовіліся, узгадненне праводзяць упаўнаважаныя органы - Міністэрства антыманапольнага рэгулявання і гандлю Беларусі і Федэральная антыманапольная служба Расіі. У выпадку адсутнасці дамоўленасці паміж МАРГ і ФАС па памеры тарыфаў выкарыстоўваецца гарантаваны механізм іх устанаўлення.

"З-за адсутнасці зацікаўленасці ў расійскага боку ў кампенсацыі недаатрыманых даходаў ААТ "Гомельтранснафта Дружба" ўзаемапрымальнага рашэння адносна росту тарыфаў не ўдалося дасягнуць ні паміж транспарціруючымі арганізацыямі, ні на ўзроўні ўпаўнаважаных органаў", - заявілі ў МАРГ. Таму працэнт росту тарыфаў быў разлічаны ў адпаведнасці з гарантаваным механізмам: сярэднегадавы індэкс спажывецкіх цэн на 2021 год, устаноўлены параметрамі прагнозу сацыяльна-эканамічнага развіцця РФ, павялічаны не больш як на 3 працэнтныя пункты.

БелТА