Міністр эканомікі Аляксандр Чарвякоў у эфіры тэлеканала "Беларусь 1" расказаў аб мерах падтрымкі айчынных прадпрыемстваў, якія працуюць на знешніх рынках, паведамляе БЕЛТА.

"Я назаву толькі некалькі мер, якія аказваюць і акажуць падтрымку нашым прадпрыемствам, якія працуюць на знешніх рынках. Па-першае, гэта пытанні крэдытавання. У рамках указа Прэзідэнта нумар 534 па падтрымцы экспарту ў гэтым годзе павялічана фінансаванне практычна на Br300 млн і дасягае ўзроўню Br2,1 млрд. А гэта сур'ёзная падтрымка для экспарцёраў. Па-другое, мы павялічылі тэрміны вяртання крэдытаў з 6 да 12 месяцаў. Гэта значыць на працягу года экспарцёр можа карыстацца гэтымі рэсурсамі. Па-трэцяе, пашыраны спіс тавараў, якія можна крэдытаваць. Туды ўнесены яшчэ прадукты харчавання. Па-чацвёртае, зняты абмежаванні на суму кантракта. Калі раней было $3 млн мінімальны ўзровень кантракта для фінансавання, то сёння практычна з любой цаной можна ісці ў банк і атрымліваць крэдыт. Гэта дае магчымасць малому бізнесу ўдзельнічаць у праграме фінансавання", - расказаў Аляксандр Чарвякоў.

Яшчэ адзін з момантаў звязаны са зніжэннем мытных працэдур, іх спрашчэннем, што таксама зніжае выдаткі для бізнесу. "У сукупнасці гэтыя 5 пунктаў якраз і стымулююць экспарт для пашырэння на новыя рынкі. І гэты пералік адкрыты. Мы кожны дзень глядзім, аналізуем сітуацыю, прадстаўляем інфармацыю ў аператыўны сітуацыйны штаб, які працуе пры ўрадзе. І пры неабходнасці ўсе прапановы, якія да нас паступаюць з боку бізнес-супольнасцей, парламентарыяў, улічваем і выкарыстоўваем, каб аблегчыць менавіта ў гэтых умовах гандаль на знешніх рынках", - адзначыў міністр.