Навіны рэспублікі

Уклад суб'ектаў малога і сярэдняга прадпрымальніцтва ў ВУП Беларусі за 2020 год склаў 26,4 працэнта (за 2019 год - 26,1 працэнта), паведамляе БЕЛТА са спасылкай на даныя Белстата.

У тым ліку ўклад малога бізнесу склаў 16 працэнтаў, сярэдняга - 7,3 працэнта, індывідуальных прадпрымальнікаў - 3,1 працэнта.

Выручка ад рэалізацыі прадукцыі, тавараў, работ і паслуг суб'ектаў малога і сярэдняга прадпрымальніцтва за 2020 год склала Br158 млрд, уклад у рэспубліканскі аб'ём выручкі - 42,2 працэнта.

На 1 студзеня ў Беларусі было 269,5 тыс. індывідуальных прадпрымальнікаў і 111,4 тыс. арганізацый малога і сярэдняга прадпрымальніцтва, у тым ліку 96,6 тыс. мікраарганізацый (87 працэнтаў ад агульнай колькасці арганізацый малога і сярэдняга прадпрымальніцтва), 12,6 тыс. малых арганізацый (11 працэнтаў) і 2,2 тыс. сярэдніх арганізацый (2 працэнты).

Найбольш распаўсюджаныя віды дзейнасці МСБ - аптовы і рознічны гандаль, рамонт аўтамабіляў і матацыклаў (34 працэнты ад агульнай колькасці арганізацый і індывідуальных прадпрымальнікаў), транспартная дзейнасць, складзіраванне, паштовая і кур'ерская дзейнасць (12 працэнтаў), прафесійная, навуковая і тэхнічная дзейнасць (10 працэнтаў). Па 8 працэнтаў прыпадае на прамысловасць і будаўніцтва.

БелТА